Түлектерге хат

Құрметті Қорғалжын мектеп-гимназиясының

1972, 1982, 1992, 2002, 2012 жылғы түлектері!

            Сіздер оқыған мектеп бүгінгі күні Қорғалжын ауданы бойынша ең үлкен, беделді білім ошағының бірі. Мектебімізді соңғы жылдары көптеген үздік оқушылар аяқтап, «Алтын белгі» иегері атағына ие болды. 2020 жылы  «Қорғалжын ауылының мектеп-гимназиясы»  Акмола облысы бойынша «Орта білім беретін үздік ұйым» байқауына қатысып, жүлде жеңімпазы, «Үздік мекеме-2020» атанды. Спорт, өнер саласында да айтулы жетістіктер аз емес.

         ҚР Президенті Қасым-Жомарт Кемелұлы Токаев: «Балаларға ерекше назар аудару керек. Себебі олардың амандығы – мемлекетіміздің жарқын болашағының сенімді кепілі. Сол себепті келесі жылды «Балалар жылы» деп жариялау керек деп есептеймін» – деді.  Мемлекет тарапынан үнемі қаржылай қолдау көрсетіледі, сонын арқасында 60 жылға жуық тарихы бар мектебіміз  ешбір қала мектебінен кем емес. Алайда, демеушілердің қолдауына сене отырып, мектебіміздің 10-жылдық, 20, 25, 30, 35, 40-жылдық түлектері ұсынысымызды елеусіз қалдырмайды деп сенеміз.

         Салауатты өмір салтын қалыптастыру, спортпен шұғылдану – деніміздің сау болуының негізгі кепілі. Салауатты өмір салтын ұстануда спорттың ролі зор. Ал спорттың адам өмірінде алатын орны маңызды екендігін бәріміз білеміз. Спортпен айналысқан адамның денсаулығы мықты, өзі шыдамды болады. Біздің ата-бабамыз «Тәні саудың – жаны сау» - деп бекер айтпаған. Спорттың қай түрімен айналысу адамның қабілетіне байланысты болады. Ол денсаулықты нығайтып қана қоймай, сонымен  қатар мінезді тәрбиелеп, ерік-жігерді шынықтырып, қиындықтарды жеңуге көмектеседі. Денсаулықты қалыптастыру, сақтау және нығайту негізінде қоғамға ұзақ және бақытты өмір кешетін дені сау жастарды қалыптастыра аламыз.

          Ал бүгінгі оқушы – ертеңгі болашағымыз. Әр балаға ата-аналары, мектеп ұстаздары жылылық нәр беріп, үлкен үмітпен қараса, өзінің денсаулығын шыңдап, білімін нығайтуға ұмтылған азамат дайындауға болады. Салауатты өмір салтын сақтау арқылы ғана дені сау қоғамға жететіндігіміз айқын. Оқушыларымызға өз денсаулығын сақтауды және денені шынықтыру жолдарын үйретіп, әр қадамын саналылықпен ойлайтын жастарды қалыптастыра алсақ, пәнді оқытудағы мақсатқа жеттік деп айтуымызға болады.

          «Өскелең ұрпақтың үйлесімді дамуы мен бақытты балалық – бұл біздің жалпыұлттық міндетіміз», - деп пікірін білдірген ел Президенті Касым-Жомарт Кемелұлы 2022 жылды «Балалар жылы» деп жариялады. Осыған орай мемлекет басшысының бұқаралық спорт пен балалар, жасөспірімдер спортын дамыту туралы айтқанын негізге ала отырып, «Қорғалжын  ауылының мектеп-гимназиясының» дене шынықтыру пәнінің ұстаздарының бастамасымен оқушыларға арналған спорт кешенін салу мақсаты көзделіп отыр. Өйткені мектепте оқитын 645 оқушыға 110 кв метр ауданымен бір ғана спорт залы бар. Қандай да бір бастама қаражатқа келіп тірелетіні белгілі. Сондықтан спорт жанашырларынан, Қорғалжын мектеп-гимназиясының түлектерінен, жастардың болашағына бей-жай қарамайтын кең жүректі азаматтардан спорт кешенін салуда қаржылай демеушілік көмек көрсететін, өскелең ұрпақтың салауатты өмір салтын ұстануға мүмкіндік беру – үлкендердің қолында екендігін айтқымыз келеді.

            «Қорғалжын ауылының мектеп-гимназиясы» коммуналды-мемлекеттік мекемесінің әкімшілігі.

            2022 жыл, сәуір.